حلم المسطرة - قصيدة

الحسن كتب:

حلم المسطرة
من كنت شافع في الاساس

راودني حلم المسطرة

عاجبني كان شكل الهدوم

ابرولي ريحتو معطرة

يارب ميتين اصل الورش

واقرا الرسم في عطبرة

دبلوم وبكلاريوس وماجستير

وفي النهاية الدكترة

ووصلت بس شفتا التعب

غايتو حكاية مقدرة

اول محاضرة في العمر

جاتنا البنية مدنقرة

ساعتين تعيدلنا في الكلام

البت تكورك بي افتراء

اوم قالو جاب قانون جديد

وادانا افكار مثمرا

و الجهد يفرق لو فرق

في الدائرة تيار مصدرا

انا مالي مال اوم والجهود

غلطي الكبير جيت احضرا

بعد الفطور والانبساط

بعد الحنك والثرثرة

جاتنا المصيبة الكبري جد

قالولنا تاااااني محاضرة

استاذ صعب والمادة نار

رسم المساقط ومنظرة

ومصيبة جات في شكل زول

كانت هدومو مغبرة

شاكي القميص بي جنبة بس

والباقي ما مشكوك وراء

وقعدنا في صابر جميع

ساعتين تمام كيف نصبرا

ود طه افتتح الكلام

بي الفاظ قوية معبرة

لغة الحوار في الهندسة

رسم المساقط ومنظرة

في الرسمة لابد من المقاس

وتكون نضيفة محبرة

وفي يوم من الايام صبح

الجو جميل والقيم سرا

قام جاني هاشم صاحبي قال

ومن دون تأني ومشورة

قال لي نقوم هسة و نفوت

نرحل بعيد من عطبرة

في جامعة السودان هناك

الراحة زائد زائد القرقرة

قتليهو اصبر يااخوي

سنوات شباب ماتخسرة

قال لي ديك بلد الجمال

راقية وكمان متحضرة

قت ليهو بس دائرة القروش

وقروشا مااظن اقدرا

وانا خالي ما عبد العزيز

وماعندي حق التزكرة

وكيفن افوت اهلي وامش

اقلق وعيونهم و اسهرا

مابمشي منك يابلد

مهما البلد رجعت ورا

وفي ام ام الطيور بقعد هنا

حتي لوقامت مجزرة.

الحسن محمد خير 2010

[b]العزيز الحسن سعدنا بمشاركتك ونتمناك اضافة لمنتداك عضوا ليس زائرا بل مشرفا ومديرا